以前讀書嘅時候，每年盛夏都會入西貢行山、游水、滑浪、曬太陽，絕對係唔少人嘅青春回憶。但講起西貢，除咗係郊遊嘅熱門勝地之外，仲係食海鮮嘅天堂呀！唔少遊客去西貢食海鮮都會去西貢市中心，但作為本地人通常都會去布袋澳，因為價錢相對實惠！今次我哋嚟到海鮮島墨魚刺身專門店，海鮮選擇又多又新鮮，店員仲細心推薦本日最靚嘅海鮮同煮法，包保食到最鮮最甜嘅海鮮啦！
花雕蛋白蒸刀背
呢個花雕蛋白蒸刀背真係大大力推薦！刀背新鮮大隻又厚肉，所以只需簡單加入花雕同蛋白，就可以將刀背嘅鮮味帶晒出嚟，味道大大提升！
蒜蓉粉絲蒸扇貝
成隻手掌咁大隻嘅扇貝鮮甜又爽口！但每次食蒜蓉粉絲蒸扇貝，主角都會被配角搶風頭，粉絲索晒扇貝嘅鮮甜味同蒜蓉香味，真係回味無窮。
豉椒炒蟶子王
一上枱就已經被香濃嘅豉椒味深深吸引住！蟶子王超大隻，肉身紥實厚身，洗得超乾淨完全無沙，加上豉椒嘅點綴，非常香濃惹味！
墨魚兩食：刺身
新鮮嘅海鮮做刺身就梗係一流啦！墨魚刺身嘅厚薄度啱啱好，相信係傳說中嘅黃金比例2mm，哈哈！口感爽口又唔會過韌，夠晒彈牙鮮甜！
墨魚兩食：椒鹽墨魚鬚
墨魚身整成刺身，咁墨魚鬚就用椒鹽食法啦！椒鹽墨魚鬚即叫即炸，炸皮夠薄，非常香口，加上椒鹽嘅調味，真係食唔停口。
